ABŞ silahlı qüvvələri İrana qarşı həyata keçirdiyi növbəti hücum seriyasını yekunlaşdırıb.
Oxu.Az xəbər verir ki, bu barədə ABŞ Silahlı Qüvvələrinin Mərkəzi Komandanlığı (CENTCOM) "X" hesabında məlumat yayıb. Bildirilib ki, əməliyyat zamanı onlarla hədəf məhv edilib.
"CENTCOM iyulun 14-də ABŞ-nin Şərq sahili vaxtı ilə saat 22:00-da (Bakı vaxtı ilə 15 iyul saat 06:00) İrana qarşı əlavə zərbələr mərhələsini başa çatdıraraq, Hörmüz boğazı və İranın sahilboyu rayonları yaxınlığında onlarla hədəfə zərbə endirib", - deyə komandanlığın "X" səhifəsindəki məlumatda bildirilib.
CENTCOM əlavə edib ki, hücum əməliyyatı fasiləsiz olaraq yeddi saat davam edib.
"Yeddisaatlıq hücum dalğası ərzində ABŞ qırıcıları, pilotsuz uçuş aparatları və gəmiləri yüksəkdəqiqlikli döyüş sursatlarından istifadə edərək İranın raket və dron mövqelərinə, Hərbi Dəniz Qüvvələrinə məxsus obyektlərə və sahil müdafiə sistemlərinə zərbələr endiriblər", - deyə komandanlığın "X" hesabında vurğulanıb.
ABŞ-li hərbçilər Hörmüz boğazı zonasında İrana qarşı yeni zərbələr endirməyə başlayıblar.
Oxu.Az xəbər verir ki, bu barədə ABŞ Silahlı Qüvvələrinin Mərkəzi Komandanlığı (CENTCOM) məlumat yayıb.
"ABŞ Mərkəzi Komandanlığının qüvvələri İranın Hörmüz boğazında ticarət gəmilərinə hücum etmək üçün istifadə etdiyi hərbi imkanları məhdudlaşdırmaq məqsədilə növbəti zərbələr seriyasına başlayıb", - deyə rəsmi məlumatda bildirilir.
Əməliyyat ABŞ-nin Şərq sahili vaxtı ilə saat 15:00-da (Bakı vaxtı ilə saat 23:00-da) start götürüb.
ABŞ Silahlı Qüvvələri İrana qarşı yeni aviazərbələr endirib.
Oxu.Az xəbər verir ki, bu barədə "ABC News" amerikalı rəsmi şəxsə istinadən məlumat yayıb. Aviazərbələrin bir neçə saat davam etdiyi bildirilir.
İranın "Mehr" agentliyinin məlumatına görə, "düşmən mərmisi" Qeşm adasına düşüb. İlkin məlumatlara görə, hadisə nəticəsində xəsarət alan yoxdur.
Digər tərəfdən, İranın "Fars" agentliyi öz mənbələrinə istinadən xəbər verir ki, ABŞ-nin Bəhreyndəki "Şeyx İsa" aviabazası və ABŞ-nin Beşinci Donanmasının bazası intensiv raket zərbələrinə məruz qalıb. Mənbənin sözlərinə görə, Bəhreyn istiqamətində hərəkət edən bütün təyyarələr marşrutlarını dəyişib və bölgədə xəbərdarlıq siqnalları işə düşüb.
