ABŞ tərəfindən beş ay davam edən hücumlara baxmayaraq, İranın raket bölmələri öz döyüş potensialını, qabiliyyətini qoruyub saxlayıb, mövcud vəziyyətə adaptasiya olmağı bacarıb.
Oxu.Az-ın məlumatına görə, bu barədə "Financial Times" nəşri ekspertlərə istinadən xəbər verib.
Analitiklərin sözlərinə görə, İran mühəndisləri bombardmanlardan sonra yeraltı bazaları tez bir zamanda bərpa edə biliblər.
Mərkəzi Kəşfiyyat İdarəsinin (MKİ) keçmiş hərbi analitiki Cim Lemson hesab edir ki, hərbçilərin həlak olması ilə nəticələnən İordaniyadakı kazarmalara son zərbələr İranın ABŞ və ərəb ölkələrinin raket əleyhinə müdafiəsini yarmaq qabiliyyətindən xəbər verir:
"Onlar orta mənzilli ballistik raketlərinin nüfuzetmə qabiliyyətini və tuşlanma dəqiqliyini artırmağa nail olublar. İran keçmiş münaqişələrin təcrübəsinə əsaslanaraq həm texniki, həm də taktiki düzəlişlər edir".
Yaxın Şərq Siyasəti üzrə Vaşinqton İnstitutunun analitiki Fərzin Nədiminin sözlərinə görə, ballistik raketlərin uçuşunun son mərhələsində müdafiə olunmaq getdikcə çətinləşir. Ekspert hesab edir ki, bunun üçün ABŞ-nin İsrailin dəstəyinə ehtiyacı ola bilər.
Cari ilin fevral ayının axırlarında ABŞ İsrail ilə birlikdə İrana zərbə endirdikdən qısa müddət sonra ABŞ-nin müdafiə naziri Pit Heqset əməliyyatın məqsədlərindən birinin "İranın hücum raketlərini və onların istehsal vasitələrini məhv etmək" olduğunu bəyan edib.
Lakin qəzetin yazdığına görə, beş ay sonra, yüzlərlə ABŞ aviazərbəsindən sonra İran raket qoşunlarının döyüş qabiliyyətini qoruyub saxlaya bilib və regiondakı hədəflərə, o cümlədən İordaniya, Küveyt, Bəhreyn, Səudiyyə Ərəbistanı və Qətərdə yüksək dəqiqlikli zərbələr endirməyə davam edir.
