Amerika Birləşmiş Ştatlarının Nebraska ştatında qeydə alınan güclü tornado nəticəsində yüzlərlə yaşayış evinə və sənaye obyektinə ciddi ziyan dəyib.
Oxu.Az xəbər verir ki, bu barədə CNN telekanalı məlumat yayıb.
Təbii fəlakət baş verən an sənaye müəssisələrindən birinin daxilində 70-ə yaxın insan olub, binanın konstruksiyası qismən uçub və nəticədə ən azı üç şəxs müxtəlif dərəcəli bədən xəsarətləri alıb.
Tornado yalnız Nebraskada deyil, qonşu Texas və Ayova ştatlarında da fəsadlar törədib. Regionda son 24 saat ərzində birdən çox tornado müşahidə edilib. Yerli rəsmilər kütləvi elektrik kəsintilərinin yarandığını, enerji verilişi xətlərinin qırıldığını və avtomobil yollarının hərəkət üçün bağlandığını bildiriblər.
Meteoroloqların proqnozlarına əsasən, Nebraska da daxil olmaqla, ABŞ-nin mərkəzi ştatlarında daha bir neçə şiddətli qasırğa gözlənilir.
