Beynəlxalq Atom Enerjisi Agentliyinin (BAEA) Rəhbərlər Şurası İran tərəfini agentliklə tam şəkildə, o cümlədən yüksək dərəcədə zənginləşdirilmiş uran ehtiyatları mövzusunda əməkdaşlığa çağıran qətnaməni qəbul edib.
Oxu.Az bu barədə "Associated Press" agentliyinə istinadən xəbər verir.
Qətnamə layihəsi Fransa, Böyük Britaniya, Almaniya və ABŞ tərəfindən təqdim edilib. Onun lehinə 21 ölkə səs verib, 10 ölkə bitərəf qalıb. Üç ölkə - Rusiya, Çin və Niger isə əleyhinə çıxış edib.
Sənəddə deyilir ki, İran özünün silah yaratmağa imkan verən səviyyəyə yaxın nüvə materialları ehtiyatları barədə BAEA-ya tam məlumat təqdim etməli, həmçinin agentlik müfəttişlərinin İranın nüvə obyektlərinə girişini təmin etməlidir. Qeyd olunur ki, bu, agentliyin nüvə materiallarının "dinc məqsədlərlə istifadədən kənara çıxmadığına" əmin olması üçün zəruridir.
İranın Vyanadakı BMT yanında daimi nümayəndəliyi bu qətnaməni tənqid edərək onu "siyasi" adlandırıb. Tehran özünün "alınmaz hüquqları"nı müdafiə edəcəyinə əminlik ifadə edib.
