"Nine Senses Fest 2026" festivalı çərçivəsində ruhani lider Qurudev Şri Şri Ravi Şankarın xüsusi axşam sessiyası keçirilib.
Oxu.Az xəbər verir ki, sessiyanın keçirilmə məqsədi stres və gərginliyin gündəlik həyatın ayrılmaz bir hissəsinə keçirildiyi dünyada daxili sükut və balansı tapmaqdır.
Sessiya ərəfəsində Qurudev Şri Şri Ravi Şankar gündəlik həyatda stresi azaltmağın, neqativ enerjinin müsbət enerjiyə çevirməyin yollarından bəhs edib.
O bildirib ki, hər bir şey vibrasiyadan ibarətdir:
"Bizim hər birimizdə enerji var və biz onu yayırıq. Bəziləri pozitiv, bəziləri isə neqativ enerji yayır və biz onu qəbul edirik. Lakin bizə heç bir yerdə mənfi enerjimizi pozitiv etməyi öyrətməyiblər. Kiçik yaşda olanda bunu edə bilirdik. Uşaqlar eyni zamanda ağlayır, sonra birdən gülməyə başlayırlar. Amma böyüklər qəmgin olursa, özünə qayıtmaq üçün aylarla zaman lazım gəlir.
Bu problemi həll etməyin yolu meditasiya və yoqadan keçir. Yoqa şüurumuzun nəyə qadir olduğunu araşdırır. Çox vaxt beynimizdə nə baş verdiyini bilmirik. Əvvəl 45-50 dəqiqə diqqətimizi saxlaya bilirdik, indi isə 10 dəqiqə saxlaya bilmirik. Beynimizi indiki zamanda saxlamaq üçün nə etmək lazım gəldiyini dərinə baxmaq lazımdır. Daxilimizdə dünyəvi bir şey - bəşəriyyət, məhəbbət var. Bütün bu mövcudluqların hamısı daxilimizdədir. Bunların hamısını yada salmağa gəlmişəm".
O, sessiya çərçivəsində iştirak edən insanların rahatlıq tapması üçün meditasiya təşkil edib. Qurudev Bakıda iyunun 12, 13 və 14-də keçiriləcək "Nine Senses Fest 2026" festivalının rəhbərliyinə axşamın təşkili üçün təşəkkürünü bildirib.
