Böyük Britaniya polisi Rusiyanın xeyrinə casusluq etməkdə şübhəli bilinən ABŞ hərbçisini saxlayıb.
Oxu.Az "Reuters" agentliyinə istinadən xəbər verir ki, bu barədə Britaniya polisi bəyanat yayıb.
Məlumata görə, əməliyyat Britaniya polisinin antiterror bölməsinin MI5 əks-kəşfiyyat xidməti, Müdafiə Nazirliyinin əks-kəşfiyyat bölməsi, ABŞ-nin hökumət qurumları, Silahlı Qüvvələri və Federal Təhqiqatlar Bürosu (FTB) ilə birgə apardığı istintaq çərçivəsində həyata keçirilib.
"41 yaşlı şəxs noyabrın 10-da Qloster şəhəri yaxınlığında saxlanılıb. O, 2023-cü il tarixli Milli Təhlükəsizlik Qanununun 1-ci və 3-cü maddələrində nəzərdə tutulan cinayətləri törətməkdə şübhəli bilinir. İstintaq çərçivəsində polis əməkdaşları Qlosterşir qraflığında iki ünvanda axtarış aparıblar. Şübhələrin əlaqələndirildiyi ölkə Rusiyadır", - deyə bəyanatda bildirilib.
FTB direktoru Keş Patel hərbçinin casusluq şübhəsi ilə saxlanıldığını və məsələnin həm ABŞ, həm də onun müttəfiqləri üçün ciddi narahatlıq doğurduğunu bildirib.
