Myanmada baş verən güclü zəlzələ Çində də hiss edilib, sərhəddə yerləşən Ruili şəhərində (Yunnan əyaləti) güclü təkanlar olub.
Oxu.Az-ın verdiyi məlumata görə, sosial şəbəkələrdə bununla bağlı çoxlu kadrlar var.
Görüntülərin biri yerli doğum evlərinin birində qeydə alınıb. Videoda iki tibb bacısının körpələri saxlamaq üçün var gücləri ilə çalışmaları əks olunub.
Qeyd edək ki, Myanmada zəlzələ zamanı ölənlərin sayı 1000 nəfəri keçib. Lakin hazırda dağıntıların təmizlənməsi işlərində çalışan ekspertlər bu rəqəmin 10 000 nəfərə çata biləcəyini deyiblər.
Zəlzələnin episentri Myanmada olsa da, Çinlə yanaşı, Tailand və Vyetnam sakinləri də yeraltı təkanları hiss ediblər. Banqkokda təbii fəlakət nəticəsində tikilməkdə olan bina uçub, doqquz nəfər həlak olub. 100-dən çox insan itkin düşmüş hesab olunur.
Tarixdə ən dağıdıcı zəlzələ 22 may 1960-cı ildə Çilidə baş verib - onun Rixter şkalası üzrə maqnitudası 9.5 qiymətləndirilib.
