Çin hakimiyyəti ABŞ administrasiyasının bəzi əməkdaşlarına viza məhdudiyyəti tətbiq etmək qərarına gəlib.
Oxu.Az-ın xəbərinə görə, bu barədə "Reuters" Çin Xalq Respublikasının Xarici İşlər Nazirliyinə istinadən məlumat verib.
Qərar Tibetlə bağlı məsələlərdə "özünü pis aparan" ABŞ rəsmilərinə şamil ediləcək. Bu bəyanat Vaşinqtonun əcnəbilərin Tibet ərazisinə çıxışı məsələlərində iştirak edən Çin rəsmilərinə əlavə viza məhdudiyyətləri tətbiq etməsindən sonra verilib.
Aprelin əvvəlində ABŞ dövlət katibi Marko Rubionun bildirdiyinə görə, ABŞ Çin rəsmilərinə ona görə viza məhdudiyyətləri tətbiq etmək qərarına gəlib ki, Çin hakimiyyəti əcnəbilərin, o cümlədən diplomatların və jurnalistlərin Tibetə daxil olmasına mane olur. Hazırda Çinin bu bölgəsinə səfər etmək istəyən əcnəbilər səyahət agentliyindən xüsusi giriş icazəsi almalıdırlar. Bu icazədə onların marşrutu ətraflı şəkildə izah ediləcək və səyahət zamanı bu marşrutdan kənara çıxmalarına icazə verilməyəcək.
