Qara dəniz regionundan taxıl tədarükündə yaranan ləngimələr və bir sıra ölkələrdə məhsuldarlıq proqnozlarını aşağı salan isti hava şəraiti avqust ayında qlobal miqyasda dənli bitkilərin iyul ayı ilə müqayisədə 2.2% bahalaşmasına səbəb olub. Nəticədə qiymətlər 2024-cü ilin mayından bəri qeydə alınan ən yüksək həddə çatıb.
Oxu.Az-ın "İnterfaks"a istinadən verdiyi məlumata görə, bu barədə BMT-nin Ərzaq və Kənd Təsərrüfatı Təşkilatının (FAO) aylıq hesabatında bildirilir.
Sənədə əsasən, avqust ayında bütün əsas dənli bitkilərin beynəlxalq qiymətlərində bahalaşma müşahidə edilib. İcmalda qeyd olunur:
"Buna əlverişsiz hava şəraiti səbəbindən əsas istehsalçı regionlarda məhsul proqnozlarının pisləşməsi ilə əlaqədar yaranan yüksək tələbat və Qara dəniz regionundan ixracla bağlı davam edən qeyri-müəyyənlik təsir göstərib".
Dünyada buğdanın qiyməti avqust ayında iyul ayına nisbətən 2.6%, illik müqayisədə isə 15% artıb. FAO mütəxəssisləri bu artımın səbəbləri sırasında Qara dəniz hövzəsindən ixracda yaranan uzunmüddətli fasilələri, isti və quraq havanın hökm sürdüyü bəzi Avropa regionlarında istehsal həcmi üzrə proqnozların azalmasını, eləcə də ixrac tədarüklərinin rəqabət qabiliyyətini artıran dolların məzənnəsinin zəifləməsini göstərirlər.
Qarğıdalının qiyməti əvvəlki ayla müqayisədə 2.5% bahalaşıb ki, bu da ABŞ-nin bəzi əsas əkin bölgələrində məhsuldarlıqla bağlı artan narahatlıqlar və Aİ-də istehsal proqnozlarının pisləşməsi ilə əlaqədardır. Bununla bərabər, etanol istehsalçıları və qarışıq yem sənayesi tərəfindən məhsula olan tələbat yüksək olaraq qalır.
İcmalda xüsusi olaraq vurğulanır ki, Hörmüz boğazının bağlanmasından sonra ərzaq resurslarının tədarükü ilə bağlı yaranan narahatlıqlar qarğıdalı qiymətlərinə əlavə təkan verib.
Bildirilir ki, avqustda sorqo və arpanın dünya qiymətləri iyul ayı ilə müqayisədə müvafiq olaraq 3.9% və 2.6% artıb ki, bu da ümumiyyətlə, yemlik taxıl bazarlarında daha stabil vəziyyəti əks etdirir.
Düyünün qiyməti isə avqustda 0.5% bahalaşıb.
Sənəddə qeyd edilir: "Hindistan düyü növlərinin kotirovkalarının artması valyuta məzənnələrindəki dalğalanmalar, Asiya və Afrika ölkələrinin davam edən satınalmaları və tədarükün gözlənilən azalması kimi amillərlə şərtlənib".
