Ekvadorda canlı yayımda teleaparıcılar girov götürüldülər - YENİLƏNİB + VİDEO

Ekvadorun hüquq-mühafizə orqanları çərşənbə axşamı “TC Televisión” telekanalının studiyasında silahlılar tərəfindən ələ keçirilən girovların əksəriyyətini azad edib.

Bu barədə ölkə prezidenti administrasiyasının rəsmi nümayəndəsi Roberto İsurieta Kanova məlumat verib.

“İndi əldə etdiyimiz məlumata əsasən, işçilərin böyük əksəriyyəti artıq buraxılıblar. Hesabatları gözləyirik. Bizim birinci vəzifəmiz hələ də TV kanalın obyektlərində girovluqda olan əməkdaşların həyatını qorumaqdır”, - deyə o bildirib.

Ekvador hakimiyyəti hələ ki, azad edilən və saxlanılan girovların sayı barədə dəqiq məlumat verməyib.

Quldurların zərərsizləşdirilməsi əməliyyatı davam edir. Hücum edənlərdən bir neçəsi saxlanılıb.

Mənbə: TASS

00:50

Silahlı şəxslər Ekvadorun “TC Televisión” telekanalının studiyasına daxil olaraq efirdə olan aparıcıları girov götürüblər.

Canlı yayımdan kadrlarda altı maskalı şəxsin yerə uzanmış kanalın əməkdaşlarına silah tuşladığı görünür.

Ekvador prezidenti Daniel Noboa təhlükəsizlik vəziyyətinin pisləşməsi fonunda ölkədə “daxili silahlı münaqişə” rejimi elan edib. O, orduya Ekvadorun müxtəlif yerlərində silahlı hücumlar təşkil edən dəstələri zərərsizləşdirmək əmri verib.

Mənbə: TASS