Ərdoğan: "Türkiyə Şimali Kiprdə dəniz bazaları yarada bilər"

"Türkiyə lazım gələrsə, Kiprin şimalında öz hərbi dəniz bazalarını yaradacaq".

Oxu.Az Haber Global-a istinadən xəbər verir ki, bunu Türkiyə Prezidenti Rəcəb Tayyib Ərdoğan Şimali Kipr Türk Respublikasına (ŞKTC) səfərindən qayıdarkən bildirib.

Yunanıstanın öz hərbi dəniz bazasını Kipr Respublikası ərazisində yerləşdirmək planları ilə bağlı sualı cavablandıran Ərdoğan Ankaranın da əks addım ata biləcəyini deyib.

Türkiyə prezidenti bir daha bəyan edib ki, Kipr probleminin həlli yalnız bölünmüş adada iki dövlətin mövcudluğu faktını tanımaqla mümkündür.

"Hər gün daha aydın olur ki, iki dövlət modeli Kipr probleminin bərabər şərtlərlə yeganə həlli yoludur", - Ərdoğan qeyd edib.