Əsl səma şousu: "SpaceX"in kosmik gəmisi Atlantik okeanı üzərində partladı

"SpaceX" şirkətinin "Starship" raketdaşıyıcı kosmik gəmi sınaq uçuşu zamanı Atlantik okeanının üzərində partlayıb.

Oxu.Az-ın xəbərinə görə, bu barədə "Space.com" nəşri məlumat verib.

Raket anomaliya ilə qarşılaşıb və buraxılışdan təxminən 8.5 dəqiqə sonra Yer atmosferində partlayıb. Nəticədə Karib dənizi üzərindəki səmada onlarla parlaq işıq görünüb. Yerli sakinlər gördükləri mənzərədən heyrətə gəliblər.

Şirkət Cənubi Texasdakı "Starbase" bazasından özünün "Starship" meqaraketinin yeddinci uçuş sınağını keçirib və 123 metrlik aparat uğurla işə düşüb.

ABŞ-li sahibkar və "SpaceX"in sahibi İlon Mask "X" sosial şəbəkəsində bildirib ki, "Starship" kosmik gəmisinin prototipinin yeddinci sınaq buraxılışı zamanı qəzaya uğramasına səbəb yanacaq sızması olub. O əlavə edib ki, bu nasazlıq səbəbindən növbəti sınaq uçuşu təxirə salınmayacaq.

"Mühərrikin yanğından mühafizə arakəsməsinin üstündəki boşluqda oksigen və ya yanacaq sızması baş verib", - deyə Mask ilkin məlumatları açıqlayıb.