Estoniya Prezidenti Alar Karis ölkədə yaşayan əcnəbiləri səsvermə hüququndan məhrum edəcək qanun imzalayıb. Lakin bu məhdudiyyət Avropa İttifaqına üzv ölkələrin vətəndaşlarına təsir etməyəcək.
Oxu.Az-ın xəbərinə görə, bu barədə Estoniyanın "ERR" teleradio şirkəti məlumat verib.
Məlumata görə, yeni qanun birbaşa Estoniyada yaşamaq hüququ olan Rusiya və Belarus vətəndaşlarının maraqlarına toxunacaq. Ölkə əhalisinin əhəmiyyətli hissəsinin səsvermə hüququnu itirəcəyinə baxmayaraq, Alar Karis bu qərarın bu qrup insanlar arasında dəstək tapacağına əminliyini ifadə edib.
"Son dərəcə vacibdir ki, səsvermə hüququndan məhrum olanlar dövlətin onları ictimai həyatdan kənarlaşdırmaq istədiyini və ya onları təhlükəsizliyə təhdid kimi gördüyünü düşünməsinlər", - deyə o vurğulayıb.
Qeyd etmək lazımdır ki, əcnəbilərin səsvermə hüququnun məhdudlaşdırılması ilə bağlı qanun layihəsi ilkin olaraq Estoniya parlamenti tərəfindən təsdiq edilib.
