Bu gün səhər Gürcüstanın cənub hissəsində ardıcıl iki zəlzələ baş verib.
Oxu.Az xəbər verir ki, bu barədə Milli Seysmik Monitorinq Mərkəzi məlumat yayıb. Bildirilib ki, yeraltı təkanların xüsusilə Samtsxe-Cavaxeti regionunda qeydə alınıb. Məlumata görə təbiət hadisələri arasında 17 dəqiqəlik fasilə qeydə alınıb.
Birinci seysmik hadisə Tbilisi vaxtı ilə saat 08:52-də (Bakı vaxtı ilə eynidir) baş verib. Zəlzələnin episentri Axalkalaki şəhərindən 20 km şimal-şərqdə, Bejano kəndində yerləşib. Seysmoloqların məlumatına əsasən, təkanların maqnitudası 4.2, ocağının dərinliyi isə 15 km təşkil edib.
İkinci zəlzələnin vaxtı isə Tbilisi vaxtı ilə saat 09:09-a təsadüf edib. Bu yeraltı təkanın episentri Axalkalakidən 18 km şimalda, Alatumani kəndi yaxınlığında aşkarlanıb. Zəlzələnin gücü 3 maqnituda, ocağı isə 12 km dərinlikdə olub.
