Hindistanın əsas çaylarından biri zəhərli köpüklə örtüldü

Hindistanda müqəddəs sayılan Yamuna çayı Yeni Dehlidən keçərkən qalın ağ köpük təbəqəsi ilə örtülüb. Köpük insanların sağlamlığı üçün təhlükə yarada bilər.

Oxu.Az-ın xəbərinə görə, bu barədə "Press Trust of India" (PTI) agentliyi məlumat yayıb.

Hindistan paytaxtının hakim Ümumi İnsan Partiyası bildirib ki, şəhər hökuməti vəziyyəti diqqətlə izləyir.

"Bu problemlə mübarizə aparmaq üçün artıq xüsusi köpükdən təmizləyicilər püskürtülüb və metropolis hökuməti vəziyyəti idarə etmək və həll etmək məqsədilə fəal tədbirlər görür", - PTI partiya sözçüsündən sitat gətirib.

Aşındırıcı köpükdə yüksək səviyyədə ammonyak və fosfat var ki, bu da tənəffüs və dəri problemləri də daxil olmaqla ciddi sağlamlıq riskləri yaradır.