Honduras Prezidenti Siomara Kastronun olduğu helikopter ölkənin mərkəzi hissəsindəki cəngəllikdə təcili eniş edib.
Oxu.Az-ın "El Heraldo" nəşrinə istinadən verdiyi məlumata görə, hadisə dövlət başçısının San-Pedro-Sula şəhərində işgüzar səfərdən paytaxt Tequsiqalpaya qayıdarkən baş verib.
Prezidentin və onunla birlikdə helikopterdə olan digər sərnişinlərin bu insidentdən zərər görmədiyi vurğulanıb.
Bununla bağlı paylaşılan görüntülərdə cəngəllikdəki açıq sahəyə enən helikopter və prezidentin hadisə yerinə gələn yerli jurnalistlərlə söhbəti əks olunub.
Kastro jurnalistlərə açıqlamasında bildirib ki, qatı duman səbəbindən görüntü pisləşib. Ekipaj əvvəlcə San-Pedro-Sulaya geri dönməyi planlaşdırsa da, sonunda helikopteri cəngəllikdə endirmək qərarına gəlib.
