Hondurasda baş verən iki silahlı hücum nəticəsində altı polis əməkdaşı da daxil olmaqla 25 nəfər həlak olub.
Oxu.Az xəbər verir ki, bu barədə "Sky News" yerli hüquq-mühafizə orqanlarına istinadən məlumat yayıb.
Bildirilib ki, ilk hadisə ölkənin şimalındakı Truxilyo bələdiyyəsindəki bir plantasiyada baş verib. Naməlum şəxslər işçilərə atəş açaraq azı 19 nəfəri öldürüblər. Ölənlərin dəqiq sayı hələ müəyyən edilməyib, çünki qohumları artıq bəzi meyitləri hadisə yerindən çıxarıblar.
İkinci hücum Qvatemala ilə sərhəd yaxınlığındakı Kortes bölgəsinin Omoa bələdiyyəsində olub. Paytaxt Tequsiqalpadan silahlı şəxslərə qarşı əməliyyatda iştirak etmək üçün gələn polislərə hücum edilib. Hadisə zamanı yüksəkrütbəli zabit də daxil olmaqla altı polis öldürülüb.
Honduras Təhlükəsizlik Nazirliyi hücumlar baş verən ərazilərə polis və hərbi qüvvələrin göndərildiyini bəyan edib.
Cinayətlərin araşdırılması üçün kriminalistlərin və prokurorların iştirakı ilə xüsusi qruplar yaradılıb.
