Hondurasın Kolon departamentində tanınmış gənc rəqqasə naməlum şəxslər tərəfindən oğurlanaraq çimərlikdə yandırılıb.
Oxu.Az xəbər verir ki, bu barədə "Need To Know" nəşri məlumat yayıb.
Santa-Rosa-de-Aquan şəhərindən olan 21 yaşlı Sindi Loani Matute Morales sentyabrın 5-də axşam saatlarında itkin düşüb. Dostları ilə görüşüb şənliyə getməyi planlaşdıran gənc qadın evdən çıxdıqdan qısa müddət sonra zənglərə cavab verməyib. Sentyabrın 6-da axşam isə rəqqasənin yanmış qalıqları qəbiristanlığın yaxınlığındakı çimərlikdə aşkar edilib.
Anasının sözlərinə görə, Morales öz təhlükəsizliyindən narahat idi. Şübhəli şəxslər tərəfindən izlənildiyi üçün o bu yaxınlarda işdən çıxaraq başqa bir əraziyə köçmüşdü.
Qızın anası, həmçinin qeyd edib ki, bir dəfə naməlum kişilər onları avtomobillə təqib ediblər. Əldə edilən məlumatlara əsasən, rəqqasəni sonuncu dəfə heç kimin tanımadığı bir qadınla birlikdə görüblər.
Hazırda müstəntiqlər şübhəliləri müəyyənləşdirmək məqsədilə Moralesin həyatının son saatlarının xronologiyasını araşdırırlar.
Qeyd olunur ki, yandırılan sənətçi şəhərdə kifayət qədər tanınmış rəqqasə olub. O, festivallarda iştirak edir və müxtəlif tədbirlərdə model kimi çalışırdı. İtkin düşməzdən bir neçə gün əvvəl Moralesin karnavaldakı rəqsini əks etdirən video internetdə geniş yayılmışdı. Bununla yanaşı, gənc qızın 13 min izləyicisi olan "TikTok" hesabı olub. Moralesin azyaşlı bir qızı qalıb.
