"Xəzər dənizi ilə bağlı ciddi tədbirlər görülməsə, onu da Aral gölünün taleyi gözləyə bilər".
Oxu.Az "Report"a istinadən xəbər verir ki, bunu İranın Siyasi və Beynəlxalq Araşdırmalar İnstitutunun tədqiqatçısı, səfir Mohsen Mohammadi AQEM Beyin Mərkəzləri Forumunun on üçüncü iclasında deyib.
O, "Güc balansındakı dəyişikliklər və qlobal təhdidlər: AQEM üçün çağırışlar və imkanlar" mövzusunda çıxışı zamanı cari keçid dövrünün qeyri-sabit olduğunu vurğulayıb:
"Qlobal güclərin dəyişməsi, idarəçilik boşluqları və sair səbəblər buna səbəb olan əsas amillərdir. Atlantik okeanın hər iki tərəfində mövcud olan problemlər, insan hüquqlarının sistematik pozulması, alimlərin qətlə yetirilməsi isə həmin amillərdən doğan nəticələrdir. Ölkələrə qarşı hücumlar, nüvə müəssisələrinə zərbə endirilməsi adi hal alıb. Burada ən çox narahatlıq doğuran məqam beynəlxalq ictimaiyyətin baş verənlərə səssiz qalmasıdır. Ədalətsiz sanksiyalar dayanıqlı inkişafı pozur, təchizat zəncirini qoparır, nəticədə sosial-iqtisadi gərginlik artır. Həmçinin iqlim dəyişiklikləri də yeni təhdidlər yaradır. Xəzər dənizində suyun səviyyəsinin azalması müşahidə olunur. Ciddi tədbirlər görülməsə, onu da Aral gölünün taleyi gözləyə bilər".
Mütəxəssis İranın hər zaman əsas diqqətini regional ticarət əlaqələrinin genişləndirilməsinə yönəltdiyini qeyd edib:
"Buna baxmayaraq, İran, təəssüf ki, ədalətsiz sanksiyalarla üzləşib. Fikrimcə, Asiya ölkələri birgə regional kiberçərçivələr formalaşdırmaq, elmi-texnoloji əməkdaşlığı gücləndirmək, texnologiya parkları yaratmaq, daha az inkişaf etmiş ölkələrdə də inkişaf etmiş infrastruktur qurmaq yolu ilə bərabərliyi təşviq edə bilərlər. Asiya ölkələrinin öz iqtisadiyyatlarına əsaslanaraq yeni təhlükəsizlik modeli formalaşdırmaları mümkündür".
