İranla Ermənistan energetika sahəsində əməkdaşlığın genişləndirilməsinə dair yeni yol xəritəsini razılaşdırıblar. Tərəflər təbii qaz ticarətinin həcminin artırılması və onun Ermənistan vasitəsilə regional bazarlara ixrac imkanlarının inkişaf etdirilməsi məqsədilə xüsusi birgə işçi qrupunun yaradılması barədə qərara gəliblər.
Oxu.Az xəbər verir ki, bu barədə "Azad İran" "Telegram" kanalı "Mehr News"a istinadən məlumat yayıb.
İranın neft naziri Möhsün Paknejad Ermənistanın ərazi idarəetmə və infrastruktur naziri Davit Xudatyan ilə görüşündə Tehranın enerji əməkdaşlığını dərinləşdirməyə və mövcud imkanlar çərçivəsində İrəvana dəstək verməyə hazır olduğunu diqqətə çatdırıb.
Danışıqlar zamanı həmçinin ticarət əlaqələrinin inkişafı, texniki və mühəndislik xidmətlərinin ixracı, neft emalı zavodunun inşası, eləcə də Ermənistanın neft məhsullarına olan ehtiyacının ödənilməsi kimi məsələlər ətrafında fikir mübadiləsi aparılıb.
M.Paknejad vurğulayıb ki, Ermənistan İranın mühüm qonşularından biridir və enerji sektoru gələcək əməkdaşlığın daha da inkişafı üçün böyük potensiala malikdir.
