Hindistanda imtahan materiallarının sızdırılması qalmaqalına görə keçirilən etiraz aksiyalarının təşkilatçıları hökumətlə razılıq əldə olunduğunu bildirərək iştirakçıları aksiyaları dayandırmağa çağırıblar.
Oxu.Az xəbər verir ki, bu barədə "Cockroach Janta Party" tələbə hərəkatı nümayəndəsi Aşutoş Ranka hökumətlə keçirilən danışıqlardan sonra keçirilən mətbuat konfransında bildirib.
Onun sözlərinə görə, hərəkatın bütün əsas tələbləri qəbul edilib və etirazçılardan dərhal aksiyaları dayandıraraq evlərinə qayıtmaları xahiş olunub.
Danışıqlarda iştirak edən Hindistanın səhiyyə naziri Caqat Prakaş Nadda görüşün konstruktiv keçdiyini bildirib. O qeyd edib ki, hökumət etirazlarla bağlı məhkəmə prosesləri, iştirakçılara qarşı cəza tədbirlərinin görülməməsi, kompensasiya ödənilməsi və tələbələrin irəli sürdüyü digər təklifləri müzakirə edib.
Nazir vurğulayıb ki, etirazçılara qarşı heç bir cəza tədbiri görülməyəcək. O, həmçinin imtahan materiallarının sızdırılması qalmaqalından sonra intihar edən tələbələrin ailələrinə qanunvericiliyə uyğun olaraq mümkün olan maksimum həcmdə kompensasiya veriləcəyini açıqlayıb.
Hindistanın Təhsil Nazirliyinə rəhbərlik edən Dharmendra Pradhan imtahan materiallarının yayılması səbəbindən başlayan tələbə nümayişləri fonunda vəzifəsindən getdiyini açıqlayıb.
Oxu.Az xəbər verir ki, o, bu barədə özünün "X" sosial şəbəkə hesabında məlumat paylaşıb.
Pradhan qeyd edib ki, istefa ərizəsini artıq baş nazir Narendra Modiyə təqdim edib.
İyulun 23-də N.Modi cəmiyyətdə ciddi narazılıq yaradan imtahan suallarının sızmasında günahkar bilinən şəxslərin tez bir zamanda məsuliyyətə cəlb olunması məqsədilə ölkədə xüsusi məhkəmələrin qurulacağını bildirib. Hökumət rəhbəri əlavə edib ki, bu qərarın icrası üçün müvafiq qurumlara lazımi tədbirlərin görülməsi barədə artıq tapşırıq verib.
Bundan bir qədər əvvəl hökumət rəsmiləri yerli əhalinin etiraz aksiyaları səbəbindən Nyu-Delhinin mərkəzi hissəsində mobil internet xidmətlərinin müvəqqəti dayandırılması barədə göstəriş verib.
