İran silahlı qüvvələri İsrailin Hayfa şəhərindəki sənaye rayonuna zərbə endirib.
Oxu.Az-ın xəbərinə görə, bu barədə İranın SNN telekanalı məlumat verib.
Məlumata görə, əməliyyat Livanın "Hizbullah" hərəkatı ilə birgə həyata keçirilib.
Həmçinin İran silahlı qüvvələri İsrailin Hayfa şəhərindəki neft emalı zavoduna zərbə endirib.
Zərbə nəticəsində yanacaq çəni alovlanıb.
Eyni zamanda İsrail hərbçiləri İran tərəfindən yenidən atəş açıldığını və raketlərin qarşısının alınmasına başlandığını bildirib.
"İsrail Müdafiə Qüvvələri İrandan İsrail ərazisinə doğru raket atıldığını qeydə alıb. Müdafiə sistemləri raketlərin ələ keçirilməsi üzərində çalışır", - deyə məlumatda qeyd edilib.
"The Times of İsrael" qəzetinin məlumatına görə, İsrailin şimalındakı Hayfa limanında raket hücumundan sonra yanğın baş verib.
Yanğından mühafizə və xilasetmə xidmətindən bildirilib ki, limandakı tankerə birbaşa zərbə dəyib və nəticədə tankerdə və sənaye tikililərindən birində alovlanma müşahidə edilib.
İsrailin Energetika Nazirliyinin rəhbəri Eli Koen bildirib ki, hücum sənaye obyektlərinə ziyan vurmayıb və yanacaq təchizatına təsir göstərməyəcək. Ətraf Mühitin Mühafizəsi Nazirliyi əlavə edib ki, hadisə nəticəsində təhlükəli kimyəvi maddələrin sızması təhlükəsi yoxdur.
Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.
İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.
Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.
İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.
Həmçinin Hörmüz boğazından gəmilərin keçidində ciddi problemlər yaranıb.
