Böyük Britaniya Kralı III Çarlz Kral Tank Alayına ilk rəsmi səfəri çərçivəsində heyət komandiri qismində "Challenger 2" tankı ilə gəzintiyə çıxıb və Britaniya ordusunun ən yeni "Challenger 3" tankını nəzərdən keçirib.
Oxu.Az bu barədə "Sky News" telekanalına istinadən xəbər verir.
Gəzintidən sonra nümayəndələr monarxdan döyüş maşını barədə təəssüratını soruşduqda, o, zarafatla "Çox ləngdir" cavabını verib. Britaniya monarxı Kral Tank Alayının fəxri polkovniki titulunu 2022-ci ildə anası Kraliça II Elizabetdən miras alıb.
Səfər çərçivəsində III Çarlz üçün Tank Muzeyinə ekskursiya təşkil olunub və ona Birinci Dünya müharibəsindən bu günədək olan zirehli texnikanın tarixi barədə məlumat verilib. Bundan əlavə, kral Kral Tank Qoşunlarının dörd keçmiş fəxri polkovniki ilə görüşüb, hərbi qulluqçuların ailə üzvləri ilə söhbət edib və mükafatlar təqdim edib.
