Naməlum şəxs Krasnodardakı "West Mall" ticarət mərkəzinin (TM) ziyarətçilərinə maçete (baltaya bənzər geniş və uzun ağızlı iti bıçaq növü - red.) ilə hücum edib.
Oxu.Az xəbər verir ki, bu barədə "Shot" "Telegram" kanalı məlumat yayıb.
Hücum edən şəxs eyni zamanda kustar üsulla hazırlanmış partlayıcı qurğunu da işə salıb.
Bildirilir ki, obyektdə güclü partlayış törədən cinayətkar daha sonra vətəndaşlara kəsici alətlə xəsarətlər yetirməyə başlayıb.
Məlumata görə, TM-in təhlükəsizlik əməkdaşı hücumun ilk hədəfi olublar. Çantasından maçete çıxaran şübhəlinin qarşısını almağa çalışan mühafizəçi döş qəfəsindən ağır zərbə alıb. Hazırda tibb işçiləri onun həyatını xilas etməyə çalışırlar.
Son məlumata görə, insident zamanı qanlı hadisədə xəsarət alanların ümumi sayı beş nəfərdir. Bir qadın aldığı xəsarətlərdən həyatını itirib.
Qeyd edək ki, ticarət mərkəzinə hücum edən şəxsin 19 yaşlı gənc olduğu müəyyənləşib. O, cinayəti törədərkən "həyatı boyunca ona edilən zülmlərə görə" intiqam aldığını bağıraraq ifadə edib. Hazırda müstəntiqlər onun şəxsiyyətini müəyyənləşdirirlər.
