Meksika hökuməti "Google" şirkətini məhkəməyə verib

Meksika hökuməti "Google" şirkətinə qarşı "Google Maps" xəritə xidmətində Meksika körfəzinin adının Amerika körfəzi olaraq dəyişdirilməsi ilə bağlı iddia qaldırıb.

Oxu.Az TASS-a istinadən xəbər verir ki, bu barədə ölkə Prezidenti Klaudiya Şeynbaum bildirib.

"Körfəzlə bağlı ABŞ hökumətinin sərəncamı bütün körfəzi deyil, yalnız ABŞ-nin kontinental şelfinə uyğun gələn hissəni nəzərdə tutur, çünki hökumətin bütün körfəzə ad vermək səlahiyyəti yoxdur. Onlar ərazinin özlərinə məxsus hissəsini istədikləri kimi adlandıra bilərlər. Amma Meksikaya aid olan hissənin adı dəyişdirilə bilməz", - Şeynbaum izah edib.

Xatırladaq ki, ABŞ Зrezidenti Donald Tramp yanvarın sonlarında inaqurasiyasından qısa müddət sonra Meksika körfəzinin adının Amerika körfəzi olaraq dəyişdirilməsi ilə bağlı sərəncam imzalayıb.