Meksikanın Xalisko ştatında "Jalisco New Generation Cartel" ("Xalisko Yeni Nəsil") narkokartelinin rəhbəri "El Menço" ləqəbli Nemesio Ruben Osegeranın xüsusi əməliyyat nəticəsində zərərsizləşdirilməsindən sonra kartel üzvlərinin hücumları nəticəsində 25 Milli Qvardiya əməkdaşı həlak olub.
Oxu.Az TASS-a istinadən xəbər verir ki, bu barədə ölkənin təhlükəsizlik və vətəndaşların müdafiəsi naziri Omar Qarsiya Arfuş məlumat verib.
Onun sözlərinə görə, Xaliskoda altı hücum qeydə alınıb. Nəticədə 25 Milli Qvardiya əməkdaşı, bir mühafizəçi və ştatın Baş Prokurorluğunun bir əməkdaşı həyatını itirib. İğtişaşlar zamanı bir mülki qadın da həlak olub.
Qeyd edək ki, Xaliskoda toqquşmalar zamanı təhlükəsizlik qüvvələri 30 silahlını zərərsizləşdiriblər. Qonşu Miçoakan ştatında baş verən 13 hücum zamanı dörd cinayətkar öldürülüb, 15 hüquq-mühafizə əməkdaşı yaralanıb. Nazir əlavə edib ki, ölkənin yeddi ştatında iğtişaşlarla əlaqəsi olan 70 nəfər saxlanılıb.
Meksikada kartel liderinin ölüm sonrası qarşıdurmada 14 nəfər həlak olub.
Oxu.Az xəbər verir ki, bu barədə "Associated Press" (AP) agentliyi məlumat yayıb.
Meksikada "Xalisco New Generation Cartel" ("Xalisko Yeni Nəsil") lideri Nemesio Ruben Osequera Servantesin öldürülməsi əməliyyatından sonra baş verən qarşıdurmalarda ən azı 14 nəfər, o cümlədən Meksika Milli Qvardiyasının yeddi üzvü həlak olub.
Hadisələr Xalisko, Miçoakan və Quanaxuato ştatlarında qeydə alınıb. Kartel üzvləri Qvadalaxara yaxınlığında atışmaya girib, yolları bağlayıb və nəqliyyat vasitələrini yandırıblar. Yaralı lider təyyarə ilə Mexiko şəhərinə aparılarkən ölüb. Prezident Klaudiya Şeynbaum vətəndaşları sakit olmağa çağırıb, hökumət 250-dən çox blokadanı aradan qaldırıb.
Qeyd edək ki, ABŞ əməliyyat üçün kəşfiyyat məlumatı təqdim edib və Osequeranın tutulmasına yardım edənlərə 15 milyon dollar mükafat vəd edib. 2009-cu ildən fəaliyyət göstərən kartel Meksikada ən güclü cinayətkar təşkilatlardan biridir.
