İslandiya hökuməti artan geosiyasi gərginlik səbəbindən Avropa İttifaqına (Aİ) qəbul prosesinin vaxtından əvvəl bərpası imkanını nəzərdən keçirir.
Oxu.Az xəbər verir ki, bu barədə "Politico" nəşri mənbələrə istinadən məlumat verib.
Məlumata görə, İslandiyanın hakim koalisiyası Aİ-yə qəbul prosesini ilkin olaraq 2027-ci ilə qədər başlatmağı planlaşdırırdı. İndi ABŞ Prezidenti Donald Trampın Qrenlandiyanın Danimarka muxtariyyəti və rüsumların işə salınması ilə bağlı təhdidlərindən sonra hökumət artıq 2026-cı ilin avqust ayında referendum keçirmək niyyətindədir.
Qəzetin yazdığına görə, İslandiya parlamenti yaxın həftələrdə səsvermənin tarixini elan etməlidir. Əgər islandiyalılar Aİ-yə qoşulmaq üçün səs versə, onlar digər namizəd ölkələrdən daha əvvəl qoşula biləcəklər. İslandiya artıq Şengen zonasına və Avropa İqtisadi Zonasına daxildir, ona görə də Aİ-nin bir çox qanunları orada qüvvədədir. Buna baxmayaraq, Aİ-yə qoşulmaq üçün Reykyavik birinci referendumun nəticələrinə əsasən, daha bir referendum keçirməli olacaq.
