Myanmada hərbi xunta üsyançıların olduğu bölgələrə humanitar yardıma icazə vermir

Myanma hərbi xuntası üsyançı qruplaşmaların (EAOs) dağıdıcı zəlzələdən zərər çəkmiş bölgələrə humanitar yardımın təmin edilməsi üçün müvəqqəti atəşkəs təkliflərini rədd edib.

Oxu.Az-ın "The Rising Nepal"a istinadən məlumatına görə, bunu Myanmanın baş naziri Min Aun Hlayin bildirib.

O, hərbi əməliyyatların davam etdiriləcəyini bəyan edib.

Yerli mediada yayılan məlumata görə, bu, zəlzələdə ölənlərin sayının 2.8 mini keçdiyi, 400 nəfərin itkin düşdüyü və dörd mindən çox insanın yaralandığı bir vaxtda humanitar səylərə birbaşa maneə törədir.

Zəlzələdən sonra EAOs hücumlarının müvəqqəti dayanmasına baxmayaraq, Min Aun Hlayin bu qrupları fasilədən istifadə edərək yenidən qruplaşmaqda və hərbi təlim keçirməkdə ittiham edib.

"Bəzi etnik silahlı təşkilatlar hazırda döyüş əməliyyatlarında iştirak etmirlər, lakin gələcək hücumlar üçün təşkilatlanır və hazırlaşırlar", - deyə siyasətçi Neypyidoda vəsait toplama tədbirində qeyd edib.

O vurğulayıb ki, belə qrupların fəaliyyətləri hələ də hücum kimi qiymətləndirilir və buna görə də Myanma Silahlı Qüvvələri təhlükəsizliyi təmin etmək üçün bütün zəruri tədbirləri görəcək.

Nəşrin məlumatına görə, dünya diqqəti zəlzələnin dağıntılarına yönəltdiyi halda, ordu ölkə boyu müqavimət qruplarına qarşı hücumlarını davam etdirib.

Xatırladaq ki, martın 28-də Myanma ərazisində güclü zəlzələ baş verib. Tailand meteorologiya departamentinin məlumatına görə, zəlzələnin maqnitudası 7.9 təşkil edib, ölənlərin sayı 3000-ə yaxınlaşıb. Zəlzələdən, həmçinin Tailand zərər çəkib, təkanlar Çin və Vyetnamda da hiss edilib.