Nepalın şimalında meydana gələn daşqın nəticəsində 30-dan çox insan həyatını itirib.
Oxu.Az-ın məlumatına görə, bu barədə yerli polis orqanlarından bildirilib.
"31 nəfər ölüb, 93 nəfər yaralanıb, daha 93 nəfər isə xilas edilib", - deyə polisin son rəsmi açıqlamasında qeyd edilib.
Qeyd edək ki, avqustun 26-da səhər saatlarında Nepalın şimal ərazilərində sel qeydə alınıb. İlkin ehtimallara əsasən, daşqın dalğası Nepal və Çin sərhədində, Rasuvaqadhi sərhəd-keçid məntəqəsindən təxminən 20 km şimal-şərqdə qar-daş uçqununun sürüşməsi səbəbindən yaranıb.
Hazırda axtarış-xilasetmə tədbirləri davam etdirilir.
Nepal hökuməti ölkənin şimal bölgələrində qəfil baş verən daşqın zonasında olan xarici turist qrupu ilə əlaqə yarada bilmir.
Oxu.Az xəbər verir ki, bu barədə Himalay respublikasının Turizm Şurası məlumat yayıb.
Şuradan bildirilib ki, ilkin siyahıya 291 əcnəbi və 93 Nepal vətəndaşı daxil edilsə də, hazırda onların harada olması və təhlükəsizliyi ilə bağlı məlumatlar dəqiqləşdirilir.
Məlumata görə, axtarılan şəxslər arasında ən azı 105 Hindistan vətəndaşı var.
Eyni zamanda, Nepalda təbii fəlakət səbəbindən "Lanqtanq-Xola" su elektrik stansiyasının (SES) tikintisində çalışan 60 işçi də itkin düşüb.
Bu barədə jurnalistlərə layihənin idarəedici direktoru Bicay Moxan Bhattari açıqlama verib. Onun sözlərinə görə, çay sularının SES-in tikildiyi ərazini basması nəticəsində işçilərlə rabitə itib. "Əlaqənin itdiyi an 60-dan çox şəxs tunelin daxilində betonlama işləri həyata keçirirdi", - deyə o qeyd edib.
Hökumətdən axtarışlara başlanmasını xahiş etdiklərini bildirən Bhattari, sel sularının stansiyanın infrastrukturuna ciddi ziyan vurduğunu və fəlakətin çay səviyyəsindən təxminən 10 metr yüksəklikdə yerləşən tunelə qədər çatdığını vurğulayıb.
Qeyd edək ki, 20 MVt gücündə olan "Lanqtanq-Xola" SES məcrasından çıxan Bhote-Koşi çayının kənarında, Rasuva dairəsində inşa olunur.
