Pentaqon rəhbəri vəzifəsini itirmə ehtimalından narahatdır

ABŞ müdafiə naziri Pit Heqset Pentaqondakı məxfi məlumatların sızması ilə bağlı son qalmaqallar fonunda getdikcə mümkün işdən çıxarılma barədə daha çox narahat olur.

Oxu.Az-ın məlumatına görə, bu barədə "The Wall Street Journal" qəzeti öz mənbələrinə istinadla xəbər verir.

Bildirilir ki, nazirlik rəhbəri Prezident Donald Trampın yaranmış vəziyyətə reaksiyasından narahatdır.

İnsayderlərə görə, ABŞ lideri artıq Heqsetin yaxın ətrafından olan insanlardan onun işinin səmərəliliyi barədə soruşmağa başlayıb. Trampın məsləhətçiləri müdafiə nazirinin KİV-dəki son çıxışlarını diqqətlə izləyirlər ki, bu da onun narahatlığını daha da artırır. O, istefadan qorxaraq, saatlarla telefon danışıqları aparır və müdafiə nazirliyindən kənarda özünə dəstək təmin etməyə çalışır. Bu səbəbdən nəşrin sözlərinə görə, hətta görüşlərə dəfələrlə gecikib.

Materialda iddia edilir ki, mümkün işdən çıxarılma şayiələri fonunda Pentaqon rəhbəri ən yaxın silahdaşlarının dairəsini daraltmağa başlayıb. O xüsusilə, məxfi məlumatların sızmasında iştirak etməkdə hələ sübut olunmamış ittihamlar fonunda əsas köməkçilərini və məsləhətçilərini qəfildən istefaya göndərib.

Pentaqonun adı açıqlanmayan əməkdaşı qeyd edib ki, ABŞ-nin məxfi əməliyyatları və ya planları haqqında hər yeni məlumat sızması qurum rəhbərində yeni narahatlıq və qorxular yaradır.