Polşada müşahidə olunan əlverişsiz hava şəraiti su basmalarına, binaların zədələnməsinə və nəqliyyatın hərəkətində ciddi fasilələrə səbəb olub.
Oxu.Az xəbər verir ki, bu barədə RMF24 məlumat yayıb.
Pşemısl şəhərində yağan güclü leysan yağışları səbəbindən küçələrdə hərəkət iflic olub, onlarca evi su basıb.
Eyni zamanda, Aşağı Sileziya voyevodluğunun Yelena-Qura şəhərindən keçən güclü fırtına, şiddətli yağış və dolu şəhər infrastrukturuna ciddi ziyan vurub. Nəticədə küçələr su altında qalıb, çoxlu sayda avtomobil qəzalı vəziyyətdə suda batıb qalıb.
Həmçinin güclü külək Yelena-Qurada yerləşən anbar binasının damını və divarlarını zədələyib. Hadisə yerindən 123 nəfər təxliyə edilib. Xilasedicilərin məlumatına görə, xoşbəxtlikdən xəsarət alan olmayıb.
Hökumətin Təhlükəsizlik Mərkəzi ölkənin səkkiz voyevodluğunun sakinlərinə leysan yağışlar, güclü külək və ildırım çaxması ilə bağlı fövqəladə xəbərdarlıq göndərib.
