Polşa Rusiyaya vaxt qoydu

"Rusiyanın Krakovdakı Baş Konsulluğuna fəaliyyətini başa çatdırmaq üçün iyunun 30-dək vaxt verilib".

Oxu.Az "Onet" portalına istinadla xəbər verir ki, bu barədə Rusiyanın Varşavadakı səfirliyinin nümayəndəsi Andrey Ordaş məlumat verib.

Ordaşın sözlərinə görə, Polşa Xarici İşlər Nazirliyi bununla bağlı ona müvafiq nota təqdim edib.

O, Varşavanın Rusiyanı diversiya təşkil etməkdə ittiham etməsinə də münasibət bildirib:

"Ünvanımıza səsləndirilən ittihamlar cəfəngiyyatdır və tamamilə əsassızdır. Polşa münasibətlərimizi daha da pisləşdirmək qərarına gəlib", - deyə səfirlik nümayəndəsi vurğulayıb.

17:34

"Polşa hakimiyyətinin Krakov şəhərindəki Rusiya Baş Konsulluğunu bağlamaq qərarı Varşava ilə Moskva arasında onsuz da acınacaqlı vəziyyətdə olan ikitərəfli münasibətlərin zəiflədilməsinə yönəlmiş ardıcıl addımların növbəti halqasıdır".

Oxu.Az xəbər verir ki, bunu Rusiya prezidentinin mətbuat katibi Dmitri Peskov jurnalistlər üçün keçirdiyi brifinqdə bildirib.

Onun sözlərinə görə, Polşa Moskvaya qarşı əsassız ittihamlar irəli sürməkdə davam edir və bu yanaşma Varşavanın rusofob siyasətindən qaynaqlanır.

"Polşa bizə qarşı düşmən mövqe sərgiləməyi seçir", - deyə Peskov əlavə edib.

13:43

Rusiyanın Krakovdakı baş konsulluğunun diplomatları "persona non grata" elan edildikləri üçün Polşanı tərk etməli olacaqlar.

Oxu.Az xəbər verir ki, bu barədə Polşa Xarici İşlər Nazirliyinin (XİN) bəyanatında bildirilir.

Qeyd olunur ki, Rusiya səfiri diplomatik nümayəndəliyin bağlanması ilə bağlı notanı təqdim etmək üçün bu gün nazirliyə dəvət olunacaq.

Bundan əlavə, Polşa XİN Rusiyanın Krakovdakı baş konsulluğunun 30 gün ərzində bağlana biləcəyini bildirib, lakin dəqiq tarix hələlik açıqlanmayıb.

12:00

Polşanın xarici işlər naziri Radoslav Sikorski Rusiyanın Krakovdakı konsulluğunu bağlamaq qərarına gəlib.

Oxu.Az xəbər verir ki, bu barədə "Onet" məlumat verib.

Sikorski konsulluğun bağlanmasını Polşa hakimiyyətinin 2024-cü il mayın 12-də Varşavada "Marywilska 44" ticarət mərkəzində baş verən yanğında Rusiya kəşfiyyat xidmətinin əlinin olduğu iddia edilən məlumatlarla əlaqələndirib.

Xatırladaq ki, həmin vaxt yanğın bir anda bir neçə yerdə başlayıb və sürətlə yayılıb. Yanğın binanı tamamilə bürüyüb və o qismən dağılıb. Hadisə nəticəsində xəsarət alan olmayıb, lakin səlahiyyətlilərin məlumatına görə, 1 400 mağaza və xidmət sektoru üzrə müəssisə yanıb.

Buna cavab olaraq, Rusiya Xarici İşlər Nazirliyinin rəsmi nümayəndəsi Mariya Zaxarova bildirib ki, Varşava Rusiya ilə münasibətləri qəsdən pozmaqda davam edərək, bununla öz vətəndaşlarının maraqlarına zidd hərəkətlər edir.