Ukrayna Prezidenti Volodimir Zelenski Milli Təhlükəsizlik və Müdafiə Şurasının (MTMŞ) ölkənin beşinci prezidenti, "Avropa həmrəyliyi"nin xalq deputatı Petro Poroşenkoya qarşı sanksiyaların tətbiq edilməsi haqqında 12 fevral tarixli qərarını təsdiqləyib.
Oxu.Az Ukrayna KİV-ə istinadla xəbər verir ki, V.Zelenskinin təsdiqlədiyi qərarda sanksiyalara məruz qalanlar arasında iş adamı İqor Kolomoyski, milyarder Konstantin Jevaqo, "Privatbank"ın keçmiş həmsahibi Gennadi Boqolyubov və dövlətə xəyanətdə ittiham olunan Viktor Medvedçuk da var.
Qərarın icrasına nəzarət MTMŞ-nin katibinə həvalə edilib. Fərman dərc edildiyi gündən qüvvəyə minir.
Ukrayna Milli Təhlükəsizlik və Müdafiə Şurası ölkənin keçmiş prezidenti Pyotr Poroşenkoya qarşı sanksiyalar tətbiq edib və onu dövlətə xəyanətdə ittiham edib.
Oxu.Az xəbər verir ki, bu barədə iki mənbəyə istinadən forbes.ua məlumat verib.
"Milli Təhlükəsizlik və Müdafiə Şurası deputat və iş adamı Pyotr Poroşenkoya qarşı sanksiyalar tətbiq edib. Ehtimal olunur ki, söhbət "Vətənə xəyanət" maddəsindən gedir", - məlumatda bildirilir.
Poroşenkonun özü isə bildirib ki, o, Dövlət Təhqiqat Bürosuna fevralın 14-dən 28-dək tarixləri əhatə edən 15 çağırış vərəqəsi alıb.
