Rəcəb Tayyib Ərdoğan Rusiya-Ukrayna danışıqları ilə bağlı: "Ədalətli sülhün uduzanı olmaz"

"2022-ci ilin martından bu yana ilk dəfə qan tökülməsini dayandırmaq üçün bir fürsət pəncərəsi açıldı. Ədalətli sülhün uduzanı olmayacaq".

Oxu.Az-ın "Haber Global"a istinadən xəbərinə görə, bu sözləri Türkiyə Prezidenti Rəcəb Tayyib Ərdoğan Albaniyanın paytaxtı Tiranada keçirilən 6-cı Avropa Siyasi Birliyinin Zirvə toplantısında çıxışı zamanı Türkiyədə keçirilən Rusiya-Ukrayna danışıqlarına münasibət bildirərkən deyib.

"Prosesin həssaslığını nəzərə alsaq, ədalətli və davamlı sülhə nail olmaq üçün tərəflərin heç bir təzyiq göstərilmədən təşviq edilməsi çox vacibdir. Cənab Tramp, Putin və Zelenski ilə ayrı-ayrılıqda görüşlərim oldu. 2022-ci ilin martından bəri ilk dəfə olaraq qan tökülməsini dayandırmaq üçün fürsət pəncərəsi açıldı. İndiki mərhələdə sülhün sürətlə bərqərar olması üçün Ukrayna və Rusiya arasında dialoq kanallarını açıq saxlanılması baxımından buradakı bütün tərəfdaşlarımızın dəstəyinə ümid edirik. Həmişə qeyd etdiyim kimi, ədalətli sülhün uduzanı olmaz. Türkiyə bu prosesdə üzərinə düşənləri etməyə davam edəcək", - deyə Ərdoğan qeyd edib.