Rusiyanın Slantsı şəhərində kustar üsulla hazırlanan saxta alkoqollu içkiyə görə azı 19 nəfər həlak olub.
Oxu.Az bu barədə Rusiya mediasına istinadla xəbər verir.
Hadisəni törədənlər müəyyən ediliblər - uşaq bağçasının 60 yaşlı tərbiyəçisi Olqa Stepanova alkoqolu 78 yaşlı Nikolay Boytsova çatdırıb, o isə zəhəri şüşələrə doldurub satıb.
Sentyabrın 25-də Nikolayın həyat yoldaşı Qalina Boytsova ərinin məhsulunu sınayarkən ağır vəziyyətdə xəstəxanaya yerləşdirilib.
Polis axtarış zamanı surroqat hazırlamaq üçün boş butulkalar və spirtli kanistrlər aşkar edib.
Məlumata görə, Stepanova və Boytsov 10 il ərzində samaqon hazırlayıb satıblar. İlkin ehtimala görə, metanol pis baxılan aparatdan şüşələrə düşə bilərdi.
Hadisə ilə əlaqədar "ehtiyatsızlıqdan iki və ya daha çox şəxsin ölümünə səbəb olma" maddəsi ilə cinayət işi açılıb.
