Çuvaşiyada (Rusiya) sahibkarın qətlinin səbəbi məlum olub.
Oxu.Az Çuvaşiya İstintaq İdarəsinin (İİ) məlumatına istinadən xəbər verir ki, Kanaş şəhərindəki mağazalardan birində sahibkarın qətli ilə bağlı Rusiya Cinayət Məcəlləsinin 105-ci maddəsinin 1-ci hissəsi (qətl) ilə cinayət işi açılıb.
İstintaqın versiyasına görə, 2025-ci il yanvarın 2-də günorta saatlarında Kanaş şəhərindəki mağazalardan birinə Şaxta baba kostyumu geyinmiş kişi daxil olub, piştaxtaya yaxınlaşaraq mağaza sahibini güllələyib. Kişi aldığı xəsarətlərdən hadisə yerində ölüb, cinayətkar isə qaçıb.
"Çuvaşiya İstintaq İdarəsinin müstəntiq və kriminalistlərinin Çuvaşiya Respublikası Daxili İşlər Nazirliyinin əməkdaşları ilə birgə səmərəli fəaliyyəti nəticəsində şübhəli şəxsin kimliyi müəyyən edilib. 2025-ci il yanvarın 3-də, səhər saatlarında o, Kanaş dairəsinin kəndlərinin birində yaşadığı evdə saxlanılıb", - məlumatda qeyd olunur.
İstintaqın versiyasına görə, qətlin səbəbi zərərçəkmişin şübhəli şəxsə olan pul borcu olub.
İlkin istintaq hərəkətləri zamanı hadisə yerinə baxış keçirilib, şahidlər dindirilblər, tibbi, məhkəmə-tibbi və ballistik ekspertizalar təyin edilib. Sübutların toplanması istiqamətində tədbirlər davam etdirilir.
İstintaq şübhəli şəxs barəsində həbs qətimkan tədbirinin seçilməsi barədə vəsatət qaldıracaq.
Rusiya Federasiyasının Çuvaşiya Respublikasının Kanaş şəhərində yanvarın 2-də Şaxta baba paltarı geyinmiş silahlı şəxsin iş adamını güllələyərək qətlə yetirdiyi anların görüntüləri yayılıb.
Oxu.Az-ın xəbərinə görə, bu barədə "SHOT" "Telegram" kanalı paylaşım edib.
Əks olunan kadrlarda qatil əvvəlcə qurbanla selfi çəkdirib, daha sonra 44 yaşlı iş adamı Yuri Surakin (digər məlumatlara görə, onun 54 yaşı olub) kassanın arxasına keçib, Şaxta baba isə əlində silahla mağazanın zalında gəzməyə başlayıb. Bundan sonra o, kürkünün altından silahı çıxarıb və mağaza sahibinə atəş açıb. Bu zaman orada alıcılar da olub.
"Hadisə yanvarın 2-də günorta saatlarında Kanaşdakı "Beryozka" mağazasında baş verib. Şaxta baba paltarı geyinmiş şəxs mağaza sahibi Yuri Surakinə qoşalüləli silahdan bir neçə dəfə atəş açıb, sonra isə hadisə yerindən qaçıb", - deyə hadisə ilə bağlı məlumatda bildirilib.
İş adamı aldığı xəsarətlərdən dünyasını dəyişib.
Rusiya Federasiyasının Çuvaşiya Respublikasının Kanaş şəhərində yanvarın 2-də Şaxta baba paltarı geyinmiş silahlı şəxs iş adamını güllələyib.
Bu barədə Oxu.Az "Mash" "Telegram" kanalına istinadən xəbər verir.
Məlumata görə, cinayətkarın üzərində qoşalülə ov tüfəngi olub və atışmadan sonra o qaçıb. Hadisə günorta saatlarında baş verib. Atəş açan şəxs keçmiş məhkum olub, öldürülən şəxs isə əvvəllər polis orqanında çalışıb.
İlkin səbəb kimi cinayətkarın keçmiş polisdən onu həbsxanaya göndərməsinə görə intiqam alması göstərilir.
Hücum edən şəxs saxlanılıb. Dindirilmə zamanı o, kostyumu konspirasiya məqsədilə aldığını etiraf edib. Bu yolla onu tez zamanda aşkara çıxarmayacaqlarına ümid etdiyini bildirib.
