İsrail ordusu bu gün İran İslam İnqilabı Keşikçiləri Korpusunun (SEPAH) daha bir yüksəkrütbəli hərbçisini öldürüb.
Oxu.Az xəbər verir ki, bu barədə İsrailin Baş naziri Benyamin Netanyahu sosial şəbəkə hesabında paylaşım edib.
Onun sözlərinə görə, SEPAH-ın Qüds qanadının 840-cı bölməsinin komandanı Əsğər Baqeri də zərərsizləşdirilib.
İsrail lideri bildirib ki, Baqeri dünyanın müxtəlif yerlərində israillilərə qarşı həyata keçirilən hücumlara görə məsuliyyət daşıyıb.
"Biz qətiyyətli şəkildə hərəkət edirik. Bizə zərər verməyə çalışan günahkarı tapacağıq. Təhdid aradan qaldırılana və məqsədlərə çatana qədər bütün qüvvəmizlə fəaliyyətimizi davam etdirəcəyik", - deyə Netanyahu bildirib.
İran İslam İnqilabı Keşikçiləri Korpusunun (SEPAH) Neft qərargahında yüksək vəzifə tutan və qurumun kommersiya işlərinə cavabdeh olan Məhəmmədrza Əşrəfi Qehinin İsrail ordusunun əməliyyatları zamanı öldürüldüyü bildirilir.
Bu barədə "Azad İran" "Telegram" kanalı məlumat yayıb.
Məlumata görə, Əşrəfi Qehinin ölümü İranın maliyyə və enerji şəbəkəsinə birbaşa zərbə kimi dəyərləndirilir.
Onun Feşam bölgəsindəki mənzilinin hədəfə alındığı açıqlanıb. SEPAH zabitinin ailəsinin də onunla birlikdə həlak olduğu vurğulanıb.
Bildirilib, Qehi SEPAH-ın Neft Qərargahının Kommersiya işləri üzrə rəhbəri olub və o, ordunun ballistik raket və pilotsuz uçuş aparatları (PUA) proqramlarının maliyyələşdirilməsində mühüm rol oynayıb.
Mənbələr qeyd edir ki, öldürülən SEPAH rəsmisinin biznes şəbəkəsi İran ordusunun hərbi imkanlarının genişləndirilməsinə və maliyyələşdirilməsinə şərait yaradıb.
İran İslam İnqilabı Keşikçiləri Korpusunun (SEPAH) kəşfiyyat rəisi Seyid Məcid Xadəmi bazar ertəsi günü ABŞ və İsrailin hava hücumları nəticəsində öldürülüb.
Oxu.Az xəbər verir ki, bu barədə SEPAH bəyanat yayıb.
"İslam inqilabını, dövlət sistemini və vətəni təxminən yarım əsr ərzində dürüst və cəsarətlə müdafiə edən bu görkəmli general kəşfiyyat və təhlükəsizlik sahələrinə çox böyük, davamlı və ibrətamiz bir töhfə vermişdi. Bu irs ölkənin kəşfiyyat icmasının uzun illər boyu, xüsusilə də xarici düşmənlərlə və onların İranda sülhü və təhlükəsizliyi pozmağa yönəlmiş məkrli planları ilə mübarizədə qürurla dayanması üçün möhkəm zəmin yaradır", - deyə bəyanatda qeyd olunub.
Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.
İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.
Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.
İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.
Həmçinin Hörmüz boğazından gəmilərin keçidində ciddi problemlər yaranıb.
