Bir il əvvəl sui-qəsd cəhdindən sağ çıxan Slovakiyanın Baş naziri Robert Fitso son günlər bir neçə dəfə iş qrafikini son anda ləğv edib.
Oxu.Az xəbər verir ki, bu barədə "Tvnoviny" xəbər portalı məlumat verib.
Qeyd olunur ki, Fitso Slovakiyada 1 May şənliklərində iştirakdan imtina edib. Onun Böyük Britaniyanın Oksford Universitetində tələbələrə mühazirəsinin vaxtı da dəyişdirilib. Rəsmi mənbələr baş nazirin proqramındakı dəyişikliklərin səbəbləri barədə məlumat vermir.
Bildirilir ki, buna səbəb Fitsoya qarşı sui-qəsd cəhdindən sonra yaranan ciddi sağlamlıq problemləridir. Baş nazir, xüsusilə, bu yaxınlarda Slovakiyada səfərdə olan Çexiyanın keçmiş prezidenti Miloş Zemanla televiziya proqramında iştirakdan imtina edib.
Xatırladaq ki, Fitsoya qarşı sui-qəsd 15 may 2024-cü ildə Slovakiyanın qərbindəki Handlova şəhərində baş verib.
Qeyd edək ki, bu gün, həmçinin Serbiyanın Prezidenti Aleksandar Vuçiçin səhhətinin qəfil pisləşməsi ilə əlaqədar ABŞ-yə səfərini təxirə salmaq məcburiyyətində qaldığı bildirilmişdi.
