İyulun 14-də, axşam saatlarında Tbilisidə beşmərtəbəli yaşayış binası uçub.
Oxu.Az bu barədə "İnterfaks" agentliyinə istinadən xəbər verir.
Gürcüstan Daxili İşlər Nazirliyinin Polis Departamentinin direktoru Vaja Siradze bildirib ki, yaşayış binasının fasadının uçması nəticəsində iki nəfər həlak olub.
Daha bir qadın yaralanaraq xəstəxanaya çatdırılıb, onun həyatı üçün təhlükə yoxdur.
Tbilisinin meri Kaxa Kaladze jurnalistlərə deyib ki, bu bina qəzalı vəziyyətdə olub və meriya sakinlərə başqa yerdə mənzillərin verilməsi təklifi ilə dəfələrlə müraciət edib, lakin bəzi sakinlər bu təklifdən imtina ediblər.
Hazırda xilasetmə işləri və sakinlərin təxliyəsi davam etdirilir.
