Tramp: "Putin və Zelenski Ukrayna üzrə razılaşma bağlamağa hazırdırlar"

"Avropalı liderlər Moskva və Kiyev arasındakı münaqişənin başa çatması ilə bağlı Rusiya Prezidenti Vladimir Putinlə qarşılıqlı əlaqədə uğur qazana bilməyiblər".

Oxu.Az-ın verdiyi məlumata görə, bu barədə ABŞ Prezidenti Donald Tramp Vaşinqtondan Mayamiyə gedən təyyarəsində jurnalistlərə bəyan edib.

Ağ Ev rəhbəri avropalı liderlərdən fərqli olaraq özünün uğur qazanacağına əminliyini ifadə edib.

"Ukrayna Prezidenti Volodimir Zelenski razılaşma bağlamaq istəyir və hesab edirəm ki, Vladimir Putin də razılaşma bağlamağa hazırdır", - deyə o, əminliklə bildirib.

Tramp hesab edir ki, tənzimləmə müzakirəsində irəliləyiş var.

O, Rusiya birbaşa investisiya fondunun rəhbəri, Rusiya prezidentinin xarici ölkələrlə investisiya-iqtisadi əməkdaşlıq üzrə xüsusi nümayəndəsi Kirill Dmitriyevin Vaşinqtona səfərini və onun ABŞ Administrasiyasının üzvləri ilə danışıqlarını şərh etməyib.