Trampın Ukrayna planının təfərrüatları məlum oldu

ABŞ Prezidenti Donald Tramp yaxın vaxtlarda Ukrayna münaqişəsinin həlli planını təqdim edəcəyini bildirib.

Oxu.Az "New York Post"a istinadən xəbər verir ki, sənəd atəşkəs rejiminə nəzarət etmək üçün Avropa qoşunlarının bölgəyə yeridilməsini nəzərdə tuta bilər.

Plan Rusiya və Ukrayna ilə müzakirə edilərək, bir neçə ay ərzində hazırlanıb. Tramp təfərrüatların yaxın günlərdə məlum olacağını qeyd edib və uğuruna ümid etdiyini bildirib.

Plan atəşkəs əldə edildikdən sonra Avropa qüvvələrinin Ukrayna ərazisinə yerləşdirilməsini nəzərdə tutur. Bu qüvvələr təhlükəsizliyi təmin etməlidir. Kiyev bu cür tədbirlərdə israrlıdır və Vaşinqton bu ideyanı dəstəkləyir.

Həmçinin sülhməramlı missiyanın yaradılması da nəzərdən keçirilir. O, Rusiya, Ukrayna və NATO üzvü olmayan neytral ölkələrin nümayəndələrindən ibarət ola bilər. Missiyanın məqsədi təmas xəttində atəşkəs rejiminə əməl olunmasına nəzarət etməkdir. ABŞ prosesdə iştirak etməyə hazırdır, lakin qoşun göndərməklə deyil, maliyyə yardımı göstərməklə və üçüncü tərəflə hərəkətləri əlaqələndirməklə.