Vatikanda Roma Papası Fransisklə vida mərasimi başlayıb.
Oxu.Az bu barədə Müqəddəs taxtın mətbuat xidmətinə istinadən xəbər yayıb.
Bildirilir ki, Papanın Vatikandakı iqamətgahı olan "Müqəddəs Marfa" evinin kapellasında keçirilən mərasimdə ilk olaraq kuriya üzvləri, Vatikan əməkdaşları, Papanın köməkçiləri və xidmət heyəti iştirak edirlər.
Çərşənbə günü tabutun Müqəddəs Pyotr kilsəsində ictimai vidalaşma üçün qoyulması gözlənilir. Bu mərasim isə üç gün davam edəcək.
Müqəddəs Taxt-tac dünən səhər 88 yaşında vəfat edən Papa Fransiskin otaqlarının möhürlənməsi proseduruna başlayıb. Çoxəsrlik ənənəyə görə, papa sarayındakı apostol mənzilləri və pontifikin son xidmət illərində yaşamağı üstün tutduğu "Müqəddəs Marfa" hotelindəki iqamətgahı möhürlənib.
Oxu.Az bu barədə Müqəddəs Taxt-tacın saytına istinadla xəbər verib.
Bildirilir ki, bu tədbir mərhumun xələfinə təhvil veriləcək sənədlərinin və şəxsi əşyalarının qorunması üçün zəruridir.
Vatikan sadə açıq tabutda uyuyan Papa Fransiskin ilk fotolarını dərc edib. Meyitin yanında İsveçrə qvardiyaçıları fəxri qarovul çəkir, prosesdə, həmçinin ali ruhani nümayəndələr də iştirak edirlər. Kardinal Kevin Farrell pontifikin səhər saat 7:35-də vəfat etdiyini bildirərək qeyd edib ki, onun bütün həyatı Rəbbə və Onun Kilsəsinə xidmətə həsr olunub.
Növbəti üç gün ərzində Papa Fransisklə vida mərasimi olacaq, buraya dünyanın hər yerindən çoxsaylı möminlərin və zəvvarların gəlməsi gözlənilir.
Pontifikin iki il əvvəl etdiyi vəsiyyətinə görə, dəfn mərasimi Vatikanın əsas kilsəsində deyil, Roma kilsələrindən biri olan Santa-Maria-Maggiore bazilikasında keçiriləcək. Burada qədim, hörmətlə yad edilən Müqəddəs Məryəm ikonası yerləşir ki, Fransisk hər xarici səfərindən əvvəl və sonra onun qarşısında dua edirdi.
Mərhum pontifiklə şəxsən vidalaşmaq istəyən dünyanın bir çox ölkələrinin liderlərinin Romaya gəlməsi gözlənilir. Bundan əlavə, Papa Fransiskin vətəni olan Argentinadan xüsusi reyslərin təşkil edilməsi planlaşdırılır ki, onun həmvətənləri öz böyük həmyerlilərinə son hörmətlərini bildirsinlər.
Dünyəvi adı Xorxe Mario Berqolyo olan Papa Fransisk tarixdə Yeni Dünyanı və katolik kilsəsinin yezuit ordenini təmsil edən ilk pontifik idi. 2013-cü ildə papa taxtına seçilən Fransisk sadəliyi, insanlara yaxınlığı və kilsədəki islahatçı təşəbbüsləri ilə yadda qalıb.
