Bu gün əslən Latın Amerikasından olan ilk pontifik, Müqəddəs Taxtda ilk yezuit və son dövrün ən qeyri-adi Katolik liderlərindən biri - Roma Papası Fransisk uzun sürən xəstəlikdən sonra vəfat edib.
Oxu.Az sizi onun daha az tanınan, lakin maraqlı tərəfləri ilə tanış edir.
Xorxe Mario Berqolyo (pontifikin əsl adı) 1936-cı il dekabrın 17-də Buenos-Ayresdə, italyan mühacir ailəsində dünyaya gəlib. Beş uşaqlı ailənin ən kiçiyi olub. Kimya-texnologiya üzrə təhsil aldıqdan sonra ruhani olmaq qərarına gəlib. 1958-ci ildə yezuit ordeninə daxil olub, Çilidə novisiatlıq keçib, sonra fəlsəfə üzrə lisenziat dərəcəsi alıb. 2001-ci il fevralın 21-də Papa II İoann Pavel tərəfindən kardinal təyin olunub. 2013-cü il martın 13-də Fransisk adı ilə Roma Papası seçilib. O, Həvari taxtında ilk qeyri-avropalı və ilk yezuit papadır. Adını yoxsulluq və mərhəmət rəmzi olan Müqəddəs Assizli Fransiskin şərəfinə götürüb. Katolik kilsəsinin 266-cı papasıdır və kasıbların, heyvanların, təbiətin hamisi hesab olunur.
2013-cü ildə "Time" jurnalı onu "İlin adamı" elan edib. Eyni zamanda, Çində ilin ən nüfuzlu 10 şəxsindən biri kimi tanınıb.
Mühafizəçi və kimyaçı kimi çalışıb
Ruhani olmamışdan öncə Berqolyo Buenos-Ayresin gecə klublarından birində mühafizəçi işləyib. Eyni zamanda, laboratoriyada kimyaçı kimi fəaliyyət göstərib və qida məhsullarının keyfiyyətini yoxlayıb, çünki kimya-texnoloq diplomuna sahib olub.
Tanqo və futbol ehtirası
Papa Fransisk gəncliyində Argentina tanqosuna dərin maraq göstərib və hətta sevimli rəqs partnyoru qadın olub. Futbolu da çox sevib: doğma şəhərinin "San-Lorenso" klubunun sadiq azarkeşi idi və 88 235 nömrəli fan-klub üzvü kimi qeydiyyatdan keçmişdi (2008-ci ildən).
35 il televizorsuz həyat
1990-cı il iyunun 15-dən etibarən televiziyaya baxmaqdan imtina edib. O, Bakirə Məryəmə verdiyi vədə sadiq qalaraq bu əyləncədən uzaq durub. Sevdiyi futbol komandasının oyunlarını belə, yalnız qəzetlərdən izləyib.
Rok musiqili albom buraxıb
2015-ci ildə "Wake Up!" adlı albom buraxıb. Bu albomda onun çıxışları proqressiv-rok üslubunda musiqi kompozisiyaları ilə müşayiət olunub.
Roma küçələrində kasıblara gizlicə yardım edib
Pontifik olduğu dövrdə belə, sadə keşiş paltarında Roma küçələrinə çıxaraq, tanınmadan kasıblara sədəqə paylayıb.
Sadəliyi ilə seçilirdi
Sadə həyat tərzi onu fərqləndirirdi. Məsələn, Boliviyaya səfəri zamanı messadan öncə paltarını dəyişmək üçün bir "Burger King"ə daxil olmuşdu.
Öz baqajını təyyarəyə özü daşıyan ilk papa idi.
Papa seçildikdən sonra Həvari Sarayına köçməkdən imtina etdi və Müqəddəs Pyotr Kilsəsi kompleksinə daxil olan Müqəddəs Marta Evində yaşamağa üstünlük verdi.
Bundan başqa o, ümumi yeməkxanada nahar edir, "papamobil"dən istifadə etmir, rəsmi taxtı isə sadə kreslo ilə əvəz etmişdi.
Yemək bişirməyi sevirdi
Papa Fransisk Vatikanda tez-tez özü üçün yemək hazırlayırdı. Onun sevimli yeməyi "banya kauda" idi - zeytun yağı, sarımsaq və anşoadan hazırlanan isti sous. Fondü kimi çörək və tərəvəzləri bu sousa batıraraq yeyirdi. Bu yemək İtaliyanın Pyemont və Fransanın Provans bölgələrində məşhurdur.
Sosial şəbəkələrdə ulduza çevrilmişdi
Sosial şəbəkələrdə böyük izləyici kütləsi qazanmışdı. "X" və "Instagram" platformalarında ümumilikdə 60 milyondan çox insan onu izləyirdi.
Yeni Dünyadan olan ilk Papa
Fransisk, Latın Amerikasından seçilən ilk papa, ilk yezuit və ilk "Fransisk" adlı pontifik idi. Onun seçimi yoxsulluq, sadəlik və mərhəmətin simvoluna çevrilmişdi.
Yumor hissi onunla birgə idi
Hər gün Müqəddəs Tomas Morun duasını edərdi: "Ya Rəbb, mənə bədən sağlamlığı və yaxşı əhval-ruhiyyə ver ki, onu qoruya bilim."
O inanırdı ki, qəm-qüssə və bədbinlik yaxşı xristianın inkişaf etdirməməli olduğu xüsusiyyətlərdir.
Bu gün artıq tam əminliklə demək olar ki, Papa Fransisk milyonlarla katolikin (və yalnız onların yox) yaddaşında kilsəni insanlara yaxınlaşdıran, təvazökarlıq, açıqlıq və sevgi ilə yol göstərən ən insani dini liderlərdən biri kimi qalacaq. Bütün həyatı ilə o, əsl mənəviyyat nümunəsi olub.
