Türkiyə Prezidenti Rəcəb Tayyib Ərdoğan və Pakistanın Baş naziri Məhəmməd Şahbaz Şərif Ermənistan lideri Nikol Paşinyanı rəhbəri olduğu Vətəndaş Sazişi Partiyasının seçkidə qələbəsi münasibəti ilə təbrik ediblər.
Oxu.Az xəbər verir ki, bu barədə Ermənistan baş nazirinin mətbuat xidməti məlumat yayıb.
"Xalqım və şəxsən öz adımdan sizi 7 iyun 2026-cı ildə Ermənistanda keçirilən parlament seçkisində rəhbərlik etdiyiniz Vətəndaş Sazişi Partiyasının uğuru münasibətilə səmimi qəlbdən təbrik edirəm. Üçüncü dəfə hökumətin qurulmasında sizə uğurlar arzulayıram. Əminəm ki, regionda uzunmüddətli sülh və sabitliyin bərqərar olması və bu istiqamətdə lazımi əməkdaşlığın təmin edilməsi ilə bağlı strateji vizyonunuz uğurla həyata keçiriləcək", - deyə Ərdoğanın təbrikində bildirilib.
Pakistan lideri də Paşinyanın rəhbəri olduğu siyasi təşkilatın qələbəsinə sevincini ifadə edib:
"Pakistan xalqı və hökuməti, şəxsən öz adımdan Ermənistanda keçirilən son parlament seçkisində qələbəniz münasibətilə sizi ürəkdən təbrik edirəm.
Pakistanın Azərbaycan ilə Ermənistan arasında sülhə və konstruktiv əməkdaşlığa böyük əhəmiyyət verdiyini vurğulamaq istərdim. Ümid edirik ki, yeni rəsmi xidmət müddətiniz Cənubi Qafqazda sülhün, sabitliyin və iqtisadi inkişafın təşviqinə töhfə verəcək".
