Vyetnamda bir gündə rekord miqdarda yağıntı qeydə alınıb.
Oxu.Az CNA agentliyinə istinadən xəbər verir ki, ölkənin mərkəzi hissəsindəki Hyue şəhərinə 1085 mm-dən 1700 mm-ə qədər yağıntı düşüb. Bununla da 1999-cu ildəki 990 mm yağıntı rekordu təzələnib.
Meteoroloqlar xəbərdarlıq ediblər ki, yaxın günlərdə ölkənin mərkəzi hissəsində güclü yağıntılar davam edəcək, daha 100-800 mm yağıntı gözlənilir.
Proqnoza görə, yağışlar oktyabrın 30-da gecədən ölkənin mərkəzindən şimala doğru keçəcək.
Xatırladaq ki, Vyetnamda ötən həftə başlayan leysan xarakterli yağışlar sel və torpaq sürüşmələrinə səbəb olub. Yaşayış məntəqələrinə ciddi ziyan dəyib, 8 600-dən çox insan təxliyə edilib.
