Tovuz rayonunda yeni doğulan körpənin ölüm səbəbi açıqlanıb.
Tibbi Ərazi Bölmələrini İdarəetmə Birliyindən (TƏBİB) Oxu.Az-ın sorğusuna cavab olaraq bildirilib ki, uşaq doğularkən ona asfiksiya (kəskin tənəffüs çatışmazlığının ən ağır forması - red.) diaqnozu təyin edilib:
"Martın 5-i saat 17:30-da Gədəbəy rayon sakini, 23 yaşlı hamilə qadın Tovuz Rayon Mərkəzi Xəstəxanasına daxil olub.
Qeysəriyyə üsulu ilə çəkisi 3 min 500 qram, boyu 50 santimetr olan körpə (oğlan) doğulub. Uşaq doğularkən ona asfiksiya diaqnozu təyin edilib.
Göstərilən bütün zəruri tibbi xidmətlərə baxmayaraq, 2025-ci il martin 5-i saat 13:30-da körpənin ölüm faktı qeydə alınıb", - deyə məlumatda bildirilib.
Əzizə İsmayılova
Tovuzda doğuş zamanı körpə ölümü baş verib.
Oxu.Az xəbər verir ki, hadisə Tovuz Rayon Mərkəzi Xəstəxanasının Doğum Şöbəsində qeydə alınıb.
Bildirilib ki, martın 5-i saat 2 radələrində Gədəbəy rayon sakini, 23 yaşlı Səmayə Əjdər qızı Abbasova doğuş üçün xəstəxanaya gətirilib, doğuş zamanı körpə ölüb.
Faktla bağlı rayon prokurorluğunda araşdırma aparılır.
Qeyd edək ki, bir müddət əvvəl Gəncədə də doğuş zamanı ana və körpəsi ölüb.
