Cəlilabadda avtomobil AŞIB: Xəsarət alanların son vəziyyəti açıqlandı

Cəlilabadın Göytəpə şəhərindən keçən hissəsində baş verən yol-nəqliyyat hadisəsi zamanı xəsarət alanların son vəziyyəti açıqlanıb.

Tibbi Ərazi Bölmələrini İdarəetmə Birliyindən (TƏBİB) Oxu.Az-ın sorğusuna cavab olaraq bildirilib ki, iyunun 23-ü, saat 11:00-da yol-nəqliyyat hadisəsi səbəbi ilə iki nəfər Cəlilabad Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.

"Onlardan 1998-ci il təvəllüdlü (kişi cinsli) şəxsə başın küt travması, gicgah təpə nahiyəsinin iri həcmli hematoması, sağ dirsək və said nahiyəsinin tam əhatə edən cırılmış yarası, (qadın cinsli) şəxsə isə bədənin müxtəlif nahiyələrinin çoxsaylı travması diaqnozu təyin edilib. Hazırda onların instrumental-diaqnostik müayinələri davam etdirilir", - deyə məlumatda bildirilir.

Əzizə İsmayılova

12:08

Cəlilabad rayonunda ağır yol-nəqliyyat hadisəsi baş verib.

Oxu.Az xəbər verir ki, hadisə Ələt-Astara magistral yolunun Cəlilabadın Göytəpə şəhərindən keçən hissəsində qeydə alınıb.

Qəza zamanı minik avtomobilinin sürücüsü qəfildən idarəetməni itirib və nəqliyyat vasitəsi yolun hərəkət hissəsindən çıxaraq aşıb.

Hadisə nəticəsində sürücü və avtomobildə olan bir sərnişin ağır xəsarətlər alıblar.

Yaralılar Cəlilabad Rayon Mərkəzi Xəstəxanasına çatdırılıblar.

Faktla bağlı araşdırma aparılır.