Tibb bacısı hamiləliyə görə müavinətini niyə ala bilmir? - AÇIQLAMA

Vətəndaş Günay Mikayılova hamiləliyə və doğuma görə müavinətini ala bilmir.

Qarşılaşdığı problemlə bağlı Oxu.Az-a müraciət edən vətəndaş deyib ki, o, Kliniki Tibbi Mərkəzdə tibb bacısı işləyir. 2024-cü ilin may ayında analıq məzuniyyətinə çıxıb:

"Həmin vaxtdan uzun müddət keçməsinə baxmayaraq, hamiləliyə və doğuma görə müavinətimi ala bilmirəm. 2025-ci ilin yanvar ayında bu məsələ ilə bağlı Tibbi Ərazi Bölmələrini İdarəetmə Birliyinə şikayət ərizəsi yazdım. Bundan sonra Kliniki Tibbi Mərkəzdən bildirilib ki, sənədlər Dövlət Sosial Müdafiə Fonduna göndərilib. Fonddan isə bildirilib ki, sənədlər əskikdir. Sənədlər üç dəfə Kliniki Tibbi Mərkəzdən Dövlət Sosial Müdafiə Fonduna göndərilsə də, imtina gəldi".

Məsələ ilə bağlı Kliniki Tibbi Mərkəzə və Dövlət Sosial Müdafiə Fonduna sorğu ünvanladıq.

Dövlət Sosial Müdafiə Fondundan Oxu.Az-ın sorğusuna cavab olaraq bildirilib ki, G.Mikayılovanın hamiləliyə və doğuma görə müavinəti ilə bağlı sənədlərinin geri qaytarılmasına səbəb vətəndaşın yanvar ayı üzrə aylıq əməkhaqqının sığortaedən tərəfindən düzgün qeyd edilməməsi olub.

"3 yaşadək uşağa qulluğa görə qismən ödənişli sosial məzuniyyət ilə bağlı ödənişi isə martın 18-də həyata keçirilib", - deyə qeyd edilib.

Kliniki Tibbi Mərkəzdən isə Oxu.Az-ın sorğusuna cavab olaraq bildirilib ki, G.Mikayılovanın 126 günlük doğuşa qədər və doğuşdan sonrakı məzuniyyətə çıxması ilə əlaqədar sosial müavinətin ödənilməsi üçün Dövlət Sosial Müdafiə Fonduna işçinin məlumatları göndərilib, lakin işçinin iş qrafiklərinin dəqiqləşdirilməsi səbəbi ilə sənədlər geri qaytarılıb:

"Müəyyənləşdirilmiş qrafik əsasında sənədlər yenidən sistemə yerləşdirilib və DSMF-dən cavab gözlənilir. Fond sənədləri təsdiqlədikdə işçinin müavinəti ödəniləcək".

Aləmdə Nəsib