Çinli fristaylçı Eylin Qu 2026-cı il Qış Olimpiya Oyunları çərçivəsində keçirilən yarışda halfpayp növündə qızıl medal qazanıb.
Oxu.Az RBC-ya istinadən xəbər verir ki, ikinci yeri digər çinli idmançı Li Fanhuey tutub, britaniyalı Zoe Atkin isə bürünc medala layiq görülüb.
Bununla da E.Qu Olimpiya Oyunları tarixində fristayl üzrə ən titullu idmançı olub, o, həm qızıl medalların, həm də ümumi medalların sayına görə rekordçudur.
İdmançı 2026-cı il Oyunlarında bundan əvvəl biq-eyr və sloupstayl növlərində gümüş medal qazanmışdı. Pekin Olimpiadasında isə onun hesabında biq-eyr və halfpayp üzrə qızıl, sloupstayldə isə gümüş medal var idi.
Bundan əlavə, E.Qu 2026-cı il Olimpiadasının ən çox qazanan idmançıları siyahısına başçılıq edir. "Forbes" jurnalının məlumatına görə, 22 yaşlı idmançı son 12 ayda 23 milyon dollar qazanıb. Bu məbləğin cəmi 100 min dolları xizək yarışlarından əldə olunub, qalan hissəsi isə reklam və sponsor müqavilələrindən gəlib.
