AFFA-nın "Zirə"ni cəzalandırmasının səbəbi bəlli olub

Azərbaycan Futbol Federasiyaları Assosiasiyasının (AFFA) İntizam Komitəsinin "Zirə" klubunu 2000 manat cərimələməsinin səbəbi bəlli olub.

"Report" xəbər verir ki, bu barədə İntizam Komitəsinin sədri Erkin Hüseynov bildirib.

Onun sözlərinə görə, Bakı təmsilçisi "Şamaxı" ilə Premyer Liqanın IV turunun matçı başa çatdıqdan sonra üç futbolçunun dopinq testindən keçməsinə şərait yaratmayıb:

"AFFA nümayəndəsi oyundan 120 dəqiqə əvvəl iclas keçirib və göstərişlərini çatdırıb. Dopinq otağı təmiz olmalı və oraya su qoyulmalıdır. Yaxın məsafədə isə ayaqyolunun olması mütləqdir. Qarşılaşma bitdikdən sonra isə oyunçulardan analiz götürülməlidir. Hər klubdan üç futbolçu seçilir. Sadəcə, "Zirə" bunu təşkil etməyib. Biz AFFA nümayəndəsinin yazdıqlarına əsasən, qərar çıxarmışıq".

"Zirə"nin mətbuat katibi Elmar Abdullazadə isə bunları söyləyib:

"Xeyr, futbolçularımız dopinq testində iştirak ediblər. Bunlar Ange Mitsinzi, Davit Volkov və Qismət Alıyevdir. Hər üçü orada olublar".

Qeyd edək ki, İntizam Komitəsi "Zirə"ni AFFA nümayəndəsinin tələblərinə əməl etmədiyi üçün 2000 manat cərimələyib. Sözügedən oyun "Şamaxı"nın qələbəsi ilə başa çatıb - 1:0.